إذا غاب الأبو ما تِغْمَض العين شنو اليحصل إذا مَا رَدَّه البين يَيُمَّه خَبِّرِينِي .. أخافن ما يجيني شنو اليحصل إذا مَا رَدَّه البين ! مثل حاجتنه للنَّسمَه = ومثل الماي أحتاجه أحس اني ابَّحَر مرعب = وبي تتلاطم أمواجه أخاف وخوفي يا يُمَّه = عليَّه اتِّحدت افواجه ظلام الدنيا وهْوَ الضَّي = واخَافن ينطفي اسراجه إلى حضن الأبو مشتاكه الرُّوح يِسَلِّيني ابْغِيَابه دمعي والنُّوح هِوَت دمعة حنيني .. أخافن ما يجيني شنو اليحصل إذا مَا رَدَّه البين ! إمامي احسين متغير = كيانه ومختلف شكله مسح بيده على راسي = وقبَّلنِي فَرِد قُبْلَه شعرت ابدمعته الطاحت = صِرِت بظنوني معتَلَّه أظن يا يُمَّه هاللَّحْظَه = بِدَتْ قصَّة يتم طفله يخيب احساسي يا ريته ولظنون ويرد لي والدي وكل شده اتهون وتِقِر ابجيته عيني .. أخافن ما يجيني شنو اليحصل إذا مَا رَدَّه البين ! على اجناح الفِكِر سَافَر = خيالي وراح للكوفه تِصَوَّر لي جسد دامي = وغِدَت دمعاتي مذروفه قطيع الرَّاس واشْفَافَه = مثل لورود مقطوفه إليه احساس يجذبني = إليه أنفاسي ملهوفه وانا ابعالم خيالي وفكري مشغول صِحِت بويه انچِتَل يا عمي لَتْقُول وعِلَتْ صرخة أنيني .. أخافن ما يجيني شنو اليحصل إذا مَا رَدَّه البين ! بنيت اشقد أمل لكن = أَلِف مِعْوَلْ صُبَحْ يهدِم وطفولة عمري أرسمها = ألم في شكلي متجَسِّم يجيني صوت كل ساعة = ما يرجع إِلِچ مُسلم ! يقِلِّي ولوحة آمالي = أَقِلَّهْ بالله خلْها اتِّم وَلَوِّنها ابْفرح من روحي والدَّار تِطِيب ابْجيِّتَه من بعد لسفار ويضمني ويحتويني .. أخافن ما يجيني شنو اليحصل إذا مَا رَدَّه البين ! أغطِّي سمعي بچفوفي = وعيش ابعالم الذِّكره كأني عَطْفه أتنفس = واشم من لهفتي عطره أخاف أحلامي تتبدد = وتجف من حلمي المطره لَچِن في كِل وَجِه يتمي = بِدَى يا يُمَّه صرت أقره ذبل غصن انتظاري وذبلت احشاي وإذا مات الصَّبر مَا ينفع الماي صرخ ظنِّي ويقيني .. أخافن ما يجيني شنو اليحصل إذا مَا رَدَّه البين !