ذبـلـت اعـيـونك بـعد مـا بـيها مـاي         يـبني لا تـبچي تـره اتـذبّل ٱحشاي

يـبني لا تـبچي و دنـام ابحضن ابوك         و نــام بـين الگمـر و الأكـبر اُخـوك
يـمّه هـان اعـله الشماته ايخضّبوك         ابـدمّك و من جورهم گطعوا رجاي

خـضـبوك ابـدمّـك و دمـعـي نــزف         ودمّـي بـالونّه احـترگ يبني ونشف
عمري خلّصته اعله عمرك بالأسف         يـاللي صـار الـموت عگبك مشتهاي

نـــام يـالـمهدك غــده ذاري الـثـره         نـام يـبني و وگفـيتي اگبـالك ضـره
لـمّـن اخــدودك شـفـتها ٱمـعـفّره         اتـغـبّرت و اظـلمّت ابـعيني سـماي

ٱظلمّت ابعيني السمه و ٱتذكّريت         يـمّـه بـسـماتك يـعـبدالله و بچيــت
تـدري مـن الـوالده يـبني اشخذيت         حـيلها و نـعش الأجـل يركض وراي

جـيت يبني و شفتك امغمّض العين         وحرت أبچي اعليك لوأبچي لحسين
يـمّه ٱگضّـي الـعمر عگبـك بالونين         و عـيب عگب حـسين أگعد بالفياي

نــام يـالـماخذ الـشـوف و ونـستي         يـمـن گبـلـك ريــت حـانـت مـوتتي
شـــوف غـسّـلتك يـيـمّه ابـدمـعتي         و مـا تـفك عـينك و لا تـسمع انداي