خادم حسين اجوابي
أحمد هادي الشمري
يحسين لو سألوني = وأَختار شيسموني
أسكت وتحچي اعيوني = خادم احسين اجوابي
يمك يبو اليمه العمر شتريد هوه ابكيفك
عاشور عندي بكل وكت وابچي بشتاك وصيفك
يا ابو المحنّه وانبنه عش الحمام بسيفك
يركض عله الليل الصبح لو صدفه يسمع طيفك
قبلة ضميري اترابك .. وشديت گلبي ابابك
هم آنه من احبابك .. يا اعز واغله احبابي
اشگد امنيات ابهالعمر يمشي العمر وأتأمل
بس التعيش وي النبض بدفتر حبيب اتسجل
ولو مو جدير بخدمتك آنه وعلي ما تقبل
اقبلني خادم للخدم لتردني يبن المرسل
يحسين گلبي امتيّم .. بالمنبر وبالمأتم
مصابك يكشاف الهم .. والله چن امصابي
ما أريد جاه ولا ملك والدنيا أبد متهمني
الخدمة تاجي وعالملا اتفاخر وترفعني
أشهگ واطير ابلا جنح وكل الحزن ميلمني
لو ترضه عني وأنكتب خادم وما تطردني
هذا اليدور ابالي .. واتصدّر اعله آمالي
وما اهتم العذالي .. الكالولي خاب احسابي
خدامك أنجوم اﻷرض والغيره تحلف بيهم
وبزنودهم كتبوا علي يا چف التلاويهم
اعله الملوك اتميزوا مو دنيا التعليهم
الخدمه دنيا وآخره يا سيدي اتنجيهم
نحيا ونموت اوياكم .. ذله العمر لوﻻكم
صوت النبض ناداكم .. آنه اعله حبكم رابي
من الطفوله واستمع للمنبر واعلامه
والبس اﻷسود لو يهل شهر الحزن وأيامه
وابچي وادگ اعله الصدر واتألم الآﻻمه
والزم المنبر والأمل انكتب من خدامه
يحسين هاي امنيتي .. يكبر باسمك صيتي
والناس تقصد بيتي .. چي اسمك ابنص بابي