اتعنّه ابو اليمه وعله اچفوفه الچفن         والـمـدامـع دم حـمـرعـالخد جــرنّ

جـــدّم الـحـر ويـخـط نگل الـجـدم         والـمـدامع تـكـشف اســرار الـندم
وابـنـه يـبراله و عـلى خـطه ألـتزم         سـجّـل بـجـيته نـجاحه مـن امـتحن

هـــزّه بــركـان الـضـمير وحـشّـمه         لـمـن شــاف بـعـينه ذيچ الـمظلمه
مـحـاصر حـسـين وعـلـيه امـجدّمه         احـشود أمـيّه الچتـلته كـلهن سعنّ

يـمـشي لـخـيام الأمـامـه ويـنـتحب         والـمـدامع دم حـمـر گامـت تـصب
والـنـدم نــارا بـوسـط گلـبه تـشب         والـشـهامه وغـيرته بـرچبه ايـحدنّ

گابـــل حـسـيـن ولـعـذره يـلـتمس         يگلـه يـبن الـرّدت الـعينه الـشمس
جـيـتك وشـايـلها بچفـوفي الـنفس         دونــك الـيـوم الـمـواضي ايـهـلهلنّ

جـيـتـك أتــعـذر يـمـيـزان الــعـدل         وانـته سـبط المصطفه خير الرسل
أفـزَعـتـكم مـــن تــلگيـت الـرحـل         ومــنـي حـــرّات الـزچيـه اتـرهـبنّ

گلــه ابــو الـيـمه لـمن يـمّه وصـل         انـهـض وعــذرك يـهـالجاي انـقـبل
واسمك ويه انصاري يالحران شمل         بـيـكم اعـيـال الـهـوا شــم يـحتمنّ

دمـــدم الــحـر وتـفـاخـر مـبـتـشر         ايگلـه والله الـيوم أگرّ عـينك واسرّ
بــس يـبـو الـيـمه تـصرّحلي الأمـر         وانــه گطّــاع الـفـتن حـين الـمحنّ

ارخـصه حسين وركب مهره ايهتفّ         سـيـفه سـجّـيل وتـولاهـم عـصـفّ
انــه حــرّ وضـربـتي الـمـا تـنوصف         صـاعقه ومـيدانه مـن حـلّ انـرجنّ

حـاوطـوه وصـابـته سـهـام الـعـده         ودمّــــه الأتگاطــــر چثــيـر ورگّده
نـــاده و الـحـومـه صــداه اتــردده         اچفـوفي دخـبرني يـبو الـيمه وفـنّ

صــال ابــو الـيـمه وتـعنه الـحومته         گابــلـه وبچفـوفـه يـمـسح جـبـهته
أخــره ودنـيـه ونـعـم مــن سـمّـته         حــر تـظـل ومـوطـنك جـنـة عـدن