انـا بـكل ساع اسولف وابتشر بيك         أنـا الـقرآن اصـير بـساعة احـجيك
دمـعـتي وفـرحتي يـحسين جـبريل         ولـهـفـاتي وحـــي ودتـنـي اعـلـيك
صرت فرض المحنه وإسمك اوذان         تـوضـيت بـدمـعتي وجـيت اصـليك
وعلى إسمك زرع ارزعهه لحروف         وتِـخضر كل قصيده يمرهه طاريك
إذا اربــع حـروفـك شــدت الـكون         إذن ويه الوجود احچي من احاچيك
گلـت بـين الـجفن والـعين يحسين         جـمالك صـوره مـرسومه بـمعاليك
نـبـض شـلـتك تـدگ وتـخفگ بـراح         شـكـثر اشـتـاگلك وبـنبضي الگيـك
أنـــا بـلـيـاك تـايـه مـالـي عـنـوان         وهويتي عله الشمس ساعة الاگيك
صـرت عبدك وعبدك يبگه سلطان         أعــوف الـدنـيه كـلهه ومـا اخـليك

أنــا الـخادم وعـبدك وآنـي مـمنون         وسـجلني بـسجلك ( عبد لحسين )
عفت كلشي وردت بس أبقه وياك         تـحت جـنح الـخدامه أهـمل الـعين
أنا من اسمك عرفت اعلوم لوزان         وقـوافي شـعري بـصدور الموالين
أمَـشي عـيوني من طرواك زنجيل         وحـزني الـقامه والـدم نـوح وونين
أصـــب الــمـاي بـالـمـاتم بـلـبيات         واســوي لـلـدمع بـخدودي شـطين
عـلى عمري ردت عمرين ورجواي         واظــل خـادم إلـك يـحسين لـلبين

أنــا بـمـيلادك أصـبـح طـشـة ورود         واذا جـيت اقـرا إسـمك أنـتثر عود
عـطر بـنفاسي حين يمرهه طاريك         أحـس كل حرف انطقه شدة ورود
وانـا بـعشره ايـديه اشـعل شـموع         أحــن لـمـن يـجـي شـعبان ويـعود
قـطار مـن الفرح والسچه طرواك         يـسـابگني الـحـنين ولـهـفتي تـزود
الـقـصيده بـمـولدك تـتـحجل ورود         واشوف ابياتي صارن حمرة اخدود
سـلاسل مـن حـرير ابـياتي اتـصير         وقــلاده هـالـقصيده مْـلَبَّسَه الـزود
أهـو شـنهو الشعر لو منته يحسين         ولا غـيـرك صُـبـح لـلـشعر مـريـود
( لِــذا عــذرا رجــاءا شـاعر الـنيل         نُـبَض گلـب الـفرات ومـالك وجـود
لـقصيده لـما گلـبها يـنبض حـسين         فـقـيـره ومـنـجل الأيــام حـاصـود
أجـي كـلي فـرح لـو مـولدك صـار         بـعـاشورك تـلـفني ثـيـابي الـسـود
إذا نــادى الـمنادي وصـاح يـحسين         اَخْتِلِطْ فرحه وحنين ومدمعي يجود
بـضـمايرنه أصـيـح بـصوت يـاسين         واظــل مـنـظور ارد لـزغـير اردود
ألــف شـاعـر اصـير بـيوم ذكـراك         وإذا انــعـاك اصــيـر بــألـف رادود