أنادي والدمع يهمي من العين = وخبْرك بالجرى ياخويه يحسين ماتت رقيه .. يابن الزچيه ١ طفله وبگت تبچي على ابوها = وكلما تون وسفه يضربوها بنت الفخر والعز يسلبوها = تالي على الهزّل يركْبوها شگل لك والدمع ياخويه مسفوح = شفتها ناحله لن تطلع الروح وانا اش بيديّه .. يابن الزچيه ٢ شلون هالطفله تخليها = تضربها من بعدك أعاديها طول الوكت لدموع تجريها = ومابطلت للنوح تدريها بچيها يا ولينا يگطْع لگلوب = تطلبك وانت عنها وسفه محجوب ابكل مسيه .. يابن الزچيه ٣ بس ما دخلنا الشام نادينا = وينك ياكافلْنا ويا والينا عاين عداك اتشمتت بينا = واستقبلتنا ابْفرحه وبْزينه واخبرك والگلب يتلاهب ابنار = علينا تفرّجوا واحنا بلا خمار يصعب عليه .. يابن الزچيه ٤ وين الهواشم ما يوافونا = عنّ الأعادي اليوم يحمونا خلهم يجوا الساعه يشوفونا = وسط الخرابه القوم خلّونا ورقيه تنتحب وتنادي ويلاه = أبويه سافر وماخذني ويّاه ما يدري بيّه .. يا ابن الزچيه ٥ شافت خيالك بالحلم زاهر = گالت عجيبه عنّيِ اتسافر تدري يابويه هالجفِن ساهر = من يوم ماغبْت الفكر حاير اگعدت تالي انشدت وين الأبو وين = گبل ساعه يناغيني ضيا العين ردّوه ليّه .. يا ابن الزچييه ٦ ايزيد اللعين اسمعها شچّايه = صاحب أخس طبْع وأخس غايه لا رحمه في گلبه ولا هْدايه = أنطاها راسك وانا ببچايه دعاين حالة الطفله يا مذبوح = تشم راسك تگل له ليش مجروح وانا سبيه .. يا ابن الزچيه ٧ حضْنت يا خويه راسك اتنادي = عاين متوني وضربة العادي بويه تركتني والگلب صادي = فگدك جمر مشعول بفّادي أظنها نامت ومنها هدا البال = أثاري ماتت ودمعي غصب سال عيوني جريه .. يا ابن الزچيه