يظل صوت التحدي وصوت الاحرار=وتظل خفّاگه بسم حسين رايات ويظل كل حر غيور ابعزم واصرار=يصيح الثار ثار حسين ما مات إخذ عبره ومثل من ثار الطفوف=خذه المختار ثاره ونال المراد كتب تاريخ نور امطرز الحروف=تخيّل مهر ومسرَّج بالامجاد لعد جرح الهواشم من غده ايروف=لا يم كل جرح ملچوم ما هاد الفرح وسط الفواطم أصبح ايطوف=شمس البسمه ضوّت على السجاد انهدم عرش الطغاة وصرح الاشرار=صدع صوت الحقيقه الخورس أصوات حي الله اليسير ابسچة الثار=يحوي اثمار من درب الكرامات ويظل كل حر غيور ابعزم واصرار=يصيح الثار ثار حسين ما مات بصوت العقل چان الحگ يناديه=تحزّم بالعزيمه وهب على اعداه بظلام الدرب چان النور حاديه=ولعد اصل النجاة الراي ودّاه مثل طبع الِسِدر أوله وتاليه=طاهر والصدق يسري اويه مسراه تدرّع بالشهاده ابوجه اعاديه=وماله بدم رگبته البطل زكّاه عشگ بيت النبوه عشگ ما صار=لا بيه طمع لا دوّر ملذات ركب مركب يعرفه ايولّد اخطار=عگد نيته اويه ربه وانكر الذات ويظل كل حر غيور ابعزم واصرار=يصيح الثار ثار حسين ما مات عِشگ عذري عشَگ والدين معشوگ=وشرب من كوثر الحب الإلهي لبس ثوب الولايه الوافي ويلوگ=ويظل لآخر زمن هالثوب زاهي والمختار نخله امحمّله اعثوگ=عسل تگطر وطعم الغير فاهي وأم الثوره حبله وتطلگ اطلوگ=بثناياهه ولد يفني الدواهي يجينه ابهالوكت ويصير مختار=ويشيل ابيمنته اسلاح المهمات ينفض عن زلمنه اكداس الغبار=التناست ذيبهه الحد ضرسه للشاة ويظل كل حر غيور ابعزم واصرار=يصيح الثار ثار حسين ما مات يالمختار بعده ايزيد موجود=وابن ازياد ظل بالكوفه للساع والد فاجر وخلّفله مولود=نفس اطباع ابوه اتوارث اطباع الكل مؤمن يتبعه ابعين صايود=مبحر بالرذيله ورافع اشراع عن شعبه العدل من يومه مفگود=مثل قالب ثلج وسط الشمس ماع شعل بارض الوطن چم حرب چم نار=وضمير العاقبه ابراسه العفن مات لچن هاك اخذ وثبه ابسوح الاهوار=زلم لا مو زلم بالموزمه آفات ويظل كل حر غيور ابعزم واصرار=يصيح الثار ثار حسين ما مات يالمختار ذوله انصار الحسين=وانصارك وجند الولي الحجه تنخاهم جمرتتجادح العين=عزمهم جبل ما واحد يرجّه متوطنين للمعركه ابكل حين=واحدهم نهج عمار نهجه بجدام الثبات اقتحموا البين=واجدام التضدهم غدت عرجه ذوله انصارك وحي ذوله الانصار=ارضعوا ثدي اليشدهم على الكلفات ربوا واتقاسموا حب علي الكرار=وبعين الدهر تذكارهم بات ويظل كل حر غيور ابعزم واصرار=يصيح الثار ثار حسين ما مات