كربلا كربلا=اللهم ارزقنا كربلا

ربّي ادعوك ابدعاء الگلبه ذاب امْن الحزن
مو نبض گلبي التسِمْعه , هذا گلبي من يون
يا إلهي حاجه عندي او ريتك اعليّه تحِن
من أموت ايصير گبري ابكربله او بيها اندفن
و الدُعا و الدُعا=اللهم ارزقنا كربلا

يا إلهي او كربله منّي سِرَت مَسْرى الدِمه
أرْد اموت او بيها يحصل دفْني يا ربّ السِمه
و السبب واضح غدى او وحْدك يرَبّي تِعلمه
ابليلة الجُمعه أريد اتْمر عليّه فاطمه !
و المُنى و المُنى=اللهم ارزقنا كربلا

يا إلهي او للحُسين انته اخْلَقِتي او نشْأتي
الْخِدْمِته چانت يرَبَي او هذه غاية خِلقْتِي
الهالسبب يا سيّدي عالفرگه تجري دمْعِتي
طينتي من كربله او لا بُد أحِنّ الطينتي
و النِدا و النِدا=اللهم ارزقنا كربلا

يا إلهي او هذا عُمْري ابيا وضِع منّي يفوت
دمْعتي تحچي بدال الساني في حال السُكوت
في مُناجاتي ابسجُودي و ابصلاتي بالقُنوت
أندّعي عند الحُسيْن ابكربله او يَمّه أموت
للرَدى للرَدى=اللهم ارزقنا كربلا

يا إلهي ارْحم خُشوعي و ابْدموعي السافحه
عيني عد مرْقد حبيبي يا إلهي شابحه
حُفْرتي خلها ابْجواره بلچي بين الأضرحه
الزاير ايْمرني ابطريقه او يقرا ليّه الفاتحه
و الرَجا و الرَجا=اللهم ارزقنا كربلا

يا إلهي او سيّدي ابساعة وفاتي من تِحين
هاذي أمنِيّة حياتي يا إله العالمين
روحي يقْبضها مَلاك الموت بيْن الحرَمين
و اعلى گبري تكتب أهلي هذا خادم للحُسين !
ذا كفى ذا كفى=اللهم ارزقنا كربلا