الله اوياك .. يگمر الله اوياك .. يبني
شيل الواك .. يگمر شيل الواك .. يبني

يا گمر هذا يومك .. بيه عزومك .. لا تگصّر يالشفيه
يا گمر وآنا اريدك .. صف عضيدك .. توگف اوتحمي الثنيه
يا گمر أرد افاخر .. يوم عاشر .. بسْمك اگبال الزجيه
يا گمر والأگوله .. للبتوله .. هذا سبع الغاضريه
ذخرناك .. يگمر ذخرناك .. يبني
شيل الواك .. يگمر شيل الواك .. يبني

عالوَعد عالوَعد .. يوم الشِدد .. تنصر أهل بيت النبوّه
عالوَعد امْن الولاده .. للشهاده .. تكبَر ابطبع المروّه
عالوَعد اوهذا چبدك .. لا يشدّك .. تشرب الماي اتروّى
عالوَعد من تنظره .. احسين اذكره .. بالعطش گلبه ايتلوّى
على اظماك .. يگمر على اظماك .. يبني
شيل الواك .. يگمر شيل الواك .. يبني

ابذمّتك زينب اختك .. على بختك .. صارت او هذه الوديعه
ابذمّتك يالمُحامي .. ليها حامي .. حتى لو چفّك گطيعه
ابذمّتك باللي ودها .. لا تردها .. واللي تامر بيه تطيعه
ابذمّتك تستجيبه .. او ليها جيبه .. حتى لو ماي الشريعه
النهر ذاك .. يگمر النهر ذاك .. يبني
شيل الواك .. يگمر شيل الواك .. يبني

رايتك راية العِز .. بيها تنجز .. النصر يا بو المراجل
رايتك الكل عرفها .. من ترفها .. بيها تندك الجحافل
رايتك خيمه خلها .. ايصير ظلها .. ايفيّي زينب و العقايل
رايتك و انت گدها .. اتحامي حدها .. حد خواتك يا بو فاضل
عرفناك .. يگمر عرفناك .. يبني
شيل الواك .. يگمر شيل الواك .. يبني

بالحرب هذا چفّك .. زين ايْعُرْفك .. لاوي ارگاب الرجاجيل
بالحرب حين تهجم .. چنها ترجم .. السما عالگوم و الخيل
بالحرب سيفك امطر .. موت أحمَر .. لا حِجاره او لا هُو سجّيل
بالحرب عالأشاوس .. بالنوارس .. مو بالطيور الأبابيل !
على اعداك .. يگمر على اعداك .. يبني
شيل الواك .. يگمر شيل الواك .. يبني
الله اوياك