لــون خـطـواتك صـبح والـدرب لـيل         والــتـراب اتـلامـسـه يـخـضـر نـجـم
نــبـرتـك جــبـريـل اثــنــاء الــصـلاة         وكـفـتك يــوم الـحـرب جـانت سـلم
وبـسـمـتك تـسـبـغ وضـــوء الانـبـياء         وبـطـن كـل كـلمه مـن حـجيك عـلم
وهـاي شـمس الله رسم وجهك اكيد         ومــن اصــرح خــاف مـجنون انـتهم
الـشمس وي وجـهك اتـساوة ابـيش         اشلون شيساوي الحقيقه ويه الرسم
ومـو حـكر مـولاي بـس عالمسلمين         مـنـهو يـكـدر يـحـتكر طـعـم الـنسم
لـون سـيف الـجوع يـنسل عالمسيح         بــدرع خـبـزك بــي تـحـط مـية ثـلم
ولـو يـهودي تـشوفه عاري بغير ثوب         تــنــزل ادمــوعـك وتـتـحـول هـــدم
يــارســول الله عـجـيـبه الـحـاربـوك         عـقـولهم صـحـراء مـن مـاي الـفهم
غـيمهم وكـت الـحرب بـي بس رعيد         وانــت غـيـمك بـالـحرب يـمطر زلـم
جـنـت مـا تـقبل نـشم الـورده حـيل         حــتــى لاتــتـروع انـشـمـها بـسـلـم
وصـــرح الـعـاكـول بـغـضا بـالـسلام         يــكـول جـــرح الـــورده لازم يـلـجم
ومـن سـمعنه بـأحد تـرجع مـن جديد         الـخوف شـفنا عـالكصص صـاير ختم
الــجـبـل هـالـمـره كــالـوا مــايـروح         وكـبـل لاتـرجـع احــد وتـكـول احــم
ركـضت اطـويريج ركـضوا يـالرسول         عـالـغـنائم واحــنـه بــالـدم نـسـتحم
وعـلـمتنه بـخـلقك انـعـوف الـمسيئ         اخــوان كـلـنه والـجـرح خــل يـلـتئم
مـسـحـنه اثـــار الـسـياط الـبـلمتون         والاعــلام اعـلـيه سـئـل كـلنه وشـم
وعـلـمتنه انـطـاول الـسـبعه جـلوس         اوي طـفـلنه الازغــر اطـولـهم قـزم
وهـسـه ذيـل يـريدنه الـماله اسـاس         ومـــا يـصـيـر وداعـتـك لــو بـالـحلم
عـلـمتننه انـصـير خـشـم الـعزه دوم         اشـلون ذيـل أيـصير يـا طـه الـخشم