عــــدد الأبـيـات
7
عدد المشاهدات
2114
تاريخ الإضافة
11/10/2010
وقـــت الإضــافــة
5:32 مساءً
شوكت اقره بضريحك وانعه ياجعفر=واصيح بصوت عالي امن ارتقي المنبر
شوكت اقره بضريحك وابچي ليك ادموم
من عيني واصب ادموعي يامسموم
وانعالك يجعفر من گلب مالوم
اصبر روحي گلي شلون واتصبر=واصيح بصوت عالي امن ارتقي المنبر
شوكت اقره بضريحك وطفي هاي النار
المشتعله بدليلي والدمع مدرار
واخلي الناس تلطم الك ليل انهار
يمصدر شيعتك أي والنعم مصدر=واصيح بصوت عالي امن ارتقي المنبر
شوكت اقره بضريحك وانحب بعبره
واظل خادم الك يامهجة الزهره
على امصابك انوح وابچي بالحضره
واگول اللي سگيته سيدي اثمر=واصيح بصوت عالي امن ارتقي المنبر
شوكت اقره بضريحك وانزف انه دموع
وبالحضره اضوي اسنيني كلها شموع
واقره بصوت عالي سيدي ومسموع
ولا اتمنه ابقه وگلبي يتحسر=واصيح بصوت عالي امن ارتقي المنبر
شوكت اقره بضريحك وطفي نار حشاي
واشكيلك يجعفر من ظلم دنياي
واجيب المخلصين الشيعه كلها وياي
تتمنه لضريحك شيعتك تحضر=واصيح بصوت عالي امن ارتقي المنبر
شوكت اقره بضريحك اشعر ولايب
على امصابك يجعفر والگلب ذايب
راح ابقه ابرجه اتنطر الغايب
يبنيلك ضريحك من يجي ويظهر=واصيح بصوت عالي امن ارتقي المنبر