حقير ومذنب وجيت اعله بابك .. الهي لاتأدبني بعقابك .. انا عبدك وأجيتك ياالهي=وظهري منحني من الدواهي ورغم كل المحارم والنواهي=كضيته للعمر عابث ولاهي أوحشه تطردني من ساحة جنابك .. الهي لاتأدبني بعقابك .. صحيفة عمري مليانه معاصي=جبتها وأرتجي منك خلاصي اخافن يوم يُؤخذ بالنواصي=ابعدلك انشمل وأنحشر عاصي والعاصي يويله من عذابك .. الهي لاتأدبني بعقابك .. اكول الروحي ياملعونة توبي=تكلي الباري يسترلي عيوبي اكللها بنعيم التوبة ذوبي=تعاندني وتضاعفلي ذنوبي وياماحذّرت روحي بكتابك .. الهي لاتأدبني بعقابك .. احذّرها واكلها الباري وصّه=لاتنسين الج بالدنيه حصه اصلحي بالعمل والعمر فرصه=لايصبح عليج العمل غصة شسوي الروحي تتناسه خطابك .. الهي لاتأدبني بعقابك .. تتناسه العقاب وهيه تدري=باجر ينعرض عالباري امري لاجن ياالهي الدنيه تغري=وانه انغريت بيها وشنهو عذري عفوك سيدي مذنب وأهابك .. الهي لاتأدبني بعقابك .. نهاري من تشع بالنور شمسه=آخذ موعظه وبالليل انسه ونفس ذاك الجهل ينعاد نفسه=غفله وتسليه ومعصيه وونسه وين انطي الوجه ساعة حسابك .. الهي لاتأدبني بعقابك .. انه اللي ضيّعت بالغفله عمري=انه المامهدت للموت كبري خايف ياالهي ودمعي يجري=وادري بالحشر انسأل ادري بيمن ضيعّت زهرة شبابك .. الهي لاتأدبني بعقابك .. ابجي والدمع يحفر بخدي=ابجي الحالتي بالكبر وحدي ابجي الغربتي ووحشتي بلحدي=ابجي ولاعمل صالح العندي باجر من يواروني بترابك .. الهي لاتأدبني بعقابك .. كلما اذكر اذنوبي يويلي=اذكر نارك وينهدم حيلي لاجن لُطفك اينبّه دليلي=وأذكر رحمتك واكطع عويلي سحابك رحمه ظللني بسحابك .. الهي لاتأدبني بعقابك .. مذنب وادري بذنوبي متنعد=وببابك اجيت بوجه اسود لاجن ياالهي الناس تشهد=احب حسين ريحانة محمد وانه بحسين اتأمّل ثوابك .. الهي لاتأدبني بعقابك .. احب حسين مشغوف بهيامه=وحملت الخدمته بصدري وسامه وحين ايلوذ كل واحد بأمامه=انا بحسين الوذن بالقيامه لو سألوني شمحضّر جوابك .. الهي لاتأدبني بعقابك ..