قسم القصيدة هاني الجمري,
عنوان القصيدة چبد الحسن. لسان حال زينب ع
يحسين أذكُّر يابعد كل العزازه
يخويي لا تنسى گطع چبده بجهازه
زيح الطشت وياه شيعوه بالجنازه
ليكون أصده بيوم تتجد عزيه
بعد الغسل لاوصال لِفوها بالاچفان
والطشت شيله ايزيد بشوفته لاحزان
سم الحسن هيج مصايب آل عدنان
وبيت النبي المختار مظلم هالمسية
سمعت نبل واسهام نشبت نعشه حيره
والعين تبصر وايد حرمه اشگد گصيره
تمنت علي الكرار ابوها بهالكسيره
لوكان حاضر ماحصل منهم أذيه
لو كان حاضر گالت بنار المصيبه
ماصوبوا جسم الحسن باسهام صيبه
والله اذا رديت يا ليث الحريبه
مايوصل التجريح نعش ابن الزچية
ونّت يبونا اشلون بعد ضعنه ضيعه
وضاگت علينا اخلافك ارحوب الوسيعه
ماترضى لو موجود وحگ امنا الوديعه
معروف يابو الصيت حماي الحميه
جميع الحقوق محفوظة لموقع شعراء أهل البيت عليهم السلام www.Shoaraa.com