قسم القصيدة هاني الجمري,
عنوان القصيدة ركضة محترگ
رگضة محترگ للماي يركض بي العمر
واحلامي البعيده انجوم والحفره شُبُر
أبحث وألحگ اهدافي المدروسه اندراس
شايل بوصلتي ظنون واجناطي الصبر
المُنيه إلي مو بالإيد أغلا امن الحصيل
متمنيها شوگه ايزيد بالحاجة السعر
ويه الشيبه أسمع وين ماوين استماع
يمكن ألگى للغاية طريگين أختصر
مطلوبي سرابه بعيد يشرد مني دوم
كل ما گول گطعة ميل ووصله يفر
لحلام الشريدة اتيه وياها العزوم
خطوات السفينة بماي ترجع تنطمر
ياريت الامل تنور يطفي تحط يباس
والرية تجر آهاتا تحوله جمر
لهداف الكبيره اوطان لالي مغربين
ماينسه الغريب اتراب فصفص بالظفر
لمراد الخفيف ايطير من راس الصغير
عن عكس الثقيل ايطيح وياك الگبر
لمدور رخيص ايعود بالمغرب شباب
موشبه الثمين ايشيب لطلوع الفجر
خايف صُحبة العكاز تسألني شگول
ماتت كل طموحاتي ايعظم لي الاجر
خايف تنطوي الايام تفرشلي الخلاص
وتلمني الحسافة اكسور ماليها جبر
عاشگ كربلا ومذيوب شمعي ايصب غرير
أشعر حگ ابو السجاد واكتبله شعر
بس ما انرزق توفيق مثل اليقرؤن
واقرى اعلا المنابر زين بيامه العشر
أتمنى مثل ياسين لرميثي اكون
لو ملا عطية ببيت لو نصه شطر
والمقتل عجم لانغام والكعبي اصير
وآخذ ونّة الكاشي واسعد وابتشر
وأنعى المرمي بالتربان وحده بلامعين
يمكن ضل ثلسّاعات ماجاه الشمر
يتگلب يمين ايسار ابن الطاهرين
كلما جه عليه سياف يرجع يعتذر
مرة يطالع الخيمات مرة اعلا الفرات
عطشان بميسل ادماه والدنيه ظهر
صوّت بن سعد بالجيش گطعوله الوريد
جاوبه الشمر ممنون دگ بيده الصدر
چي هالگد غلات احسين والزهرة البتول
متوشينه من كل صوب وجروحه اشكثر
جاه ابچفه سيف وشاف خزره وعنده صوت
لارجع ضميره صوت لا فاد الخزر
تعرف منهو جدي ايگول گال اعرف أكيد
بس ناوي وابد ماعود عن هذا الامر
زينب من وصلها الخيل بانت بالطفوف
تتوازن على المظلوم تمشي وتعتثر
وصلت شبگت الممدود وازجرها اللعين
أوّل مرة جنب احسين زينب تنزجر
غيره الوالي عنده وزود حگ لمخدرات
مايرضى ابد تنهان اخته ام الخدر
وگفت وگفة المهيوب گالت تركة روح
لاصوت على العباس من جنب النهُر
بس لومو ثگيل الحيف غماها بغشاه
ماصار الشمر سياف وحسين النحُر
سهم گلبك دخل گلبي مننته
ولو من أنا من صوبك مننته
ولامامر يوم دمعي لك مننته
أشيل اعيوني لجل الغاضرية
هاني الجمري
مأجورين
جميع الحقوق محفوظة لموقع شعراء أهل البيت عليهم السلام www.Shoaraa.com