قسم القصيدة هاني الجمري,
عنوان القصيدة هلال محرم
عز اعلا عيني المنتظر يستهل يهلال
وعيونه حمره ودم بدل لدموع همال
هليت يانبلة محرم ترشگ اسهام
وتنفذ بصدر الغيور اهموم والام
خفف على ابن العسكري وخل جرحه يلتام
لتقول راس حسين جده بعالي عسال
لاتصوّب امحمد المهدي هلال عاشور
سدد نواشبك اعلا گلبي وخله مفطور
صاغي لك ابآذاني والخاطر المكسور
خبرني صدق الشيب متعفر بلرمال
المهدي صاحب هالعزه وماظني يگدر
لتگول من صهوة جواده اشلون من خر
ومخشّب إلسانه العطش وبچبده خنجر
والخيل عوّد حمحمة وللخيم صهّال
وتطلع من اخباها عزيزة عمه عباس
توصل لخوها تشوفه يلفظ آخر انفاس
يبعدها بن جوشن وصدر احسين ينداس
مايحتمل جده يدوسه الشمر بنعال
لاايوصل الحجة بگت زينب غريبه
مدهوشه فوگ التلّه واخيمها سليبه
وتنادي انهص لينا يا كبيش الكتيبه
انچان حي اتسلَّبت نسوان واطفال
لا ايكون يسمع شبَّت بلخيام نيران
والغيره ماشمَّت لحد الشاطي دخان
ولا رجَّع چفوفه ونهرهم قمر عدنان
فرّت يتاماهم براري اتدور موال
ابن الحسن لحَّد ايخبره بليلة الشوگ
ضربوا على زينب وهلها امن الذعر طوگ
برجليها تمشي الشام ليش وخاليه النوگ
لوطر فجر يوم احدعش يتبدل الحال
كلما اتشد حاجبها صدَّت عالي لرماح
لبدور وانجوم السَّعد بالحِل ولرواح
فضلاً عن الطفل الصغير ايشوف بصياح
باربع اسنين الباقر اتحمل هالاهوال
يهلال وبعدك تطلع بعينين ابو الثار
موكافي طول العام گلبه المشتعل نار
لا توصف العاشر ولا اتفصل له شل صار
يدري بصارع كربلا مفصلها تفصال
معلوم عنده عمته المتورمه لمتون
طابع لحد ساعة غسلها اعلا الجسد لون
مسبيه لرض الشام حرمة اشلون يسبون
يمناها كان حسين والعباس لشمال
بت سيد الكونيين من طينه وترابه
طبت اديار الشوم خلوها بخرابه
غير العليل إلي بگى ماضل گرابه
نحلان من ثگل المرض لو ثگل لغلال
أبوذية:
يجدي بماتمك روحي اْسيره
مطر دمعاتي لك ماهي اْسيره
وطريق العبره بدمومي اْسيره
وغص بالماي كل صبح ومسيه
جميع الحقوق محفوظة لموقع شعراء أهل البيت عليهم السلام www.Shoaraa.com