قسم القصيدة هاني الجمري,
عنوان القصيدة ليلة مسلم ابن عقيل
مسلم وگف مابين اهل الكوفه مرسول
وحشوده عنده وزود تالي بوحدته يجول
چنه احاچي حسين خانوني وشنو تگول
تقصير مني اتگول تقبل عذري مولاي
لكن گبل يومين رسلولك مراسيل
وانفضو بهاليوم ودارتني المواويل
لا دار عندي ولاسكن شفت الاهاويل
دايم احس فيي الخطر يتخطى وياي
أسمحلي لومني بذر مولاي تقصير
حيرانه روحي والجسد نتخبى ونسير
ماظني نلحگ بالظعن وبكربله نصير
كوفان نكبت بالعهد ماثبتت براي
حر الظهر والصيف راواني الاذيه
هيّن لجل طرواك يا ابن الزچيه
اتمنى شربة ماي چبدي ملتظيه
عطشان ومن كثر العطش تتفتت احشاي
وامحادد الدور استضل چني امن لجناب
لالي في هالديره اهل لا خل ولا احباب
بس طوعه منهم حنت او فتحت لي الباب
روتني من دون الخلايگ بارد الماي
حين إلي يوگف كل عمل ربح وخساره
ليها ياْبن عمي اشهد وعطها البشاره
آوتني من جور وحكم قصر الامارة
فعل المراجل منها شفته بيوم بلواي
هاني الجمري
دعواتكم لهذا الفقير
جميع الحقوق محفوظة لموقع شعراء أهل البيت عليهم السلام www.Shoaraa.com