قسم القصيدة هاني الجمري,
عنوان القصيدة گبل المعركة العباس
گبل المعركة العباس .... چف اخته اعلا چفينه
ويقلها بعد ساعات ... گلبچ ألله يعينه
لمّاها بحنانه وگام .. برهن ليها دگ سدره
وحاچاها بلطيف الصوت .. ماحاچاها بالزجره
يابت والدي المهيوب .. وبنت البضعة الزهره
مادام الهوى بريتي
لا تصدگين ذليتي
ولا تخافين وحنيتي
لودگت طبول الشوم .. گلبچ لا تدگينه
موناسي الفحل من گال .. يكفل زينب العباس
من صوبي اختي طمني البال .. افل الجيش روس براس
محد يوصلچ مادام .. بيديني الدرع والطاس
يزينب ليچ يبغوني
دخلي بهدبة عيوني
وصايه اعليچ وصوني
لاكحلها لبونا اليوم.. من شبّكنا بيدينه
قالت والنعم منك .. وتسلم ليه هالخوه
محسوده وعليه الزود .. وزودك ينطلب نخوه
بس كل الوجل والحيف .. تفتل شوكتك قوه
وتضرب راحي خلاني
ومن مثلك بعد ثاني
هم هاشمي وعدناني
بس خوفي تظل مرغوم .. وعوگة اعليك تلفينه
گال إلها الصبر هم زين .. يختي اتحزمي وصبري
لو شفتيني رحت الماي .. وبالرجعه انكسر ظهري
ولو شفتي النشب بالعين .. لا تتحيري بأمري
لو شفتيني دون ازنود
وراسي امطبر بعامود
ومني اتبده ماي الجود
عذريني الجسد مطروح .. فوگ الثرى امگطعينه
گالت هالعذر مقبول .. لكن والدمع هامي
خبرني اخونا حسين .. اجمع تالي ايتامي
لكن وينك ابهالليل .. لو صار الشمر حامي
واذا بالغربه عفتوني
ويطبع سوطة بمتوني
مابتكون خي عوني
وبكتارك حدينه البيد .. أثاري الشمر يحدينه
جميع الحقوق محفوظة لموقع شعراء أهل البيت عليهم السلام www.Shoaraa.com