يا سبيلَ النجاة= يا أبا عبد الله
ما نهاب المماة= يا أبا عبد الله
* * *
من مُهَجنه و الضمير= يعله صوت البينه

انبايعك يبن البشير= و للعهد خطّينه
اوياك حددنه المصير= ابدربك احنه امشينه
ما يهمنه اشما يصير= و يصعب اليثنينه
هٰذه نهج الأُباة= يا أبا عبد الله
ما نهاب المماة= يا أبا عبد الله
* * *
إي يبِن خيْر العمَل =مو سهِل تغييره
حُبّك البينه انشتَل= هاك اخذ تعبيره
إحنه أنصارك نظَل= نلتزم هالسيره
ما يروِّعنه الأجل= و ما نظل ابحيره
إنته معنه الحياة= يا أبا عبد الله
ما نهاب المماة= يا أبا عبد الله
* * *
إحنه خطّينه العَهَد= و نصرَك ايشرُّفنه
ما نعوفك للأبد= ما نِزِل موقفنه
و جرّب ابوكْت الشدد= بالشدد تعرفنه
نگلب الحومه ابرعد= و نسمه ما تعصفنه
نرخص التضحيات=يا أبا عبد الله
ما نهاب المماة= يا أبا عبد الله
* * *
و الله ملّينه الصبر =انريد نرخص دمنه
كلنه لامرك ننتظر= موقفك يلهمنه
با چر ايطر الفجُر= و للحرب قدِّمنه
تلگه هاذي السمات= يا أبا عبد الله
ما نهاب المماة= يا أبا عبد الله
* * *
نرتقب نور الصباح= الذلّه ما نقبّلها
اتنادي حيَّ اعله الفلاح= لحظه نتأمّلها
نعتني السوح الكفاح= ملحمه انحوِّلها
عن مسرَّه وانشراح= هالحرب ندخلها
كل خُطانه ابثبات= يا أبا عبد الله
ما نهاب المماة= يا أبا عبد الله
* * *



رضا العزيز
2009م

Testing
عرض القصيدة