قسم القصيدة رعد حميد السماوي,
عنوان القصيدة الله أصيح الله
1. الله أصيح الله ياهو العدل وأنخاه
2. عالمشرعه عبّاس وأنت گطيع الراس
ياهو العدل وأنخاه
( 1 )
3. بِسْمَك أسلّي الروح ماغيرهَ أسالي
4. عَنّك عدل لو لا مَحّد حچالي
5. أُوْ ماترضه بين أجناب يظهر خيالي
6. تالي إعلَه رمح البين راسك بُرالي
7. طَوَّح ظعنْهَه أُوشال أُوْ لَوَّح على المّيال
راسَك وِلينه
8. وأحْنَه إعْله هزل النوگ شِفْتَك جَسَد مسحوگ
وِاْمْگطِعينَه
9. ويلاه وَلف ويلاه عگبَك سِلَتني الآه
( 2 )
10. أَنْظُرْ بُگايه أجساد تتوسد إرمال
11. أُوْ روس إعْله روس إرماح صافيكُم إنشال
12. من شفتك اعله الگاع ماضَل عَلَيْ حال
13. كل ما أَهمّن ليك تِسحَلْني الأحْبال
14. إلْ حَرّ الشّمس مَكشوف وَيَّ التُّرب مَدْيوف
وِأْمْسَلّبينَك
15. لا خنصُر أُوْ لا راس إبِخيلِ العِدَه تِنداس
وِأْمْخَذمينَك
16. ويلاه والف ويلاه ولامن فِزَع لعِداه
ياهو العدل وانخاه
( 3 )
17. ماسالت أوّل نوب عيني إعله تالي
18. حال الفجيده إشحال تنظُر لحالي
19. صرت أخْفي عالشّمّات ضيم الجرالي
20. وَنّي أُوْ مِسيل العين وَرّجَن حالي
21. سجّت هزِلهه الگوم أوْ رَفَت بيارغ شوم
تحدي إبْسبينَه
22. وينك صحت عبّاس ياصاحب النّوماس
بيرغَك وينه
23. ويلاه والف ويلاه ولا من جواب الگاه
( 4 )
24. مثلك يبو السجاد دم راسي سايل
25. إخلافك طُبَرتّه إعليك بروس المحامل
26. لاوالي منكم گام رَد عني عايل
27. أُوْ لامن بُطَا عالماي عن حالي سايل
28. للمشرعه صَدّيت وين الوَعَد ناديت
وين الكفاله
29. رَدّت عليَّ إعداك هذا يمينه أُوْ ذاك
جودَه أُوْ شِماله
30. ويلاه والف ويلاه شگدر ألمْ إعضاه
ياهو العدل وأنخاه
(5 )
31. عبّاس أعذره أبهاي محّد حِچاله
32. دَم الجمد بالعين والعمد حاله
33. لو يدري بخته اشصار راعي الكفاله
34. چا رد يمينه إعليه أُوْ چا رد شماله
35. اشلون أنشد من الناس لو رِدْت اصل عبّاس
عالمصرع أُوْگف
36. رحت أتبع الآثار ماي أُوْ دِمَه المِگطار
من جوده والچفْ
37. ويلاه والف ويلاه دمعي إعله فيض إدماه
( 6 )
38. أدري أبخبرنه إحسين يمرد دِليلك
39. ما أشتكيلك حال دمعي دِليلك
40. عدوانكْ الذبحوك أُوْ نهبوْا شِليلكْ
41. رَدّوا على الصيوان گادوا عِليلَك
42. إبنك علي السجاد إبحبل اليسر يِنْگاد
وأمفرعينَه
43. أُوْما وحده مِثلي اليوم مسبيّه سَبْي الروّم
وَاْكْفِلْ ضَعينَه
44. ويلاه والف ويلاه دهري شعظم بلواه
ياهو العدل وأنخاه
جميع الحقوق محفوظة لموقع شعراء أهل البيت عليهم السلام www.Shoaraa.com